கவிஞர் சி.கலையரசன் அவர்களின் வீதியில் தவழும் விதைகள் - ஒரு பார்வை - சோலச்சி

 

கவிஞர் சி.கலையரசன் அவர்களின் வீதியில் தவழும் விதைகள் – ஒரு பார்வை – சோலச்சி

    தமிழரின் வரலாறு என்பது நீண்ட நெடிய பாரம்பரியத்தை கொண்டது. இலக்கணம், இலக்கியத்தில் இயல் இசை நாடகமாய் திகழும் முத்தமிழுக்கு என்று நிறைய சிறப்புகள் உண்டு. அதனை கொண்டாடும் விதமாக நாள்தோறும் தமிழில் எண்ணற்ற நூல்கள் வெளி வந்த வண்ணம் உள்ளன. அந்த வகையில் கவிஞர் சி.கலையரசன் அவர்களின் வீதியில் தவழும் விதைகள் என்கிற கவிதை நூல் தமிழ் உலகிற்கு புதிய வரவாக கிடைத்துள்ளது. தனது தாய் தந்தையருக்கு இந்நூலை அர்ப்பணித்துள்ள கவிஞர் சி.கலையரசன் அவர்கள் எண்ணற்ற பாடுபொருள்களை உள்வாங்கி தனக்கே உரிய எளிய நடையில் கவிதைகளைப் புனைந்துள்ளார்.

       வாசிப்பவர்களுக்கு ஏற்ற எளிய நடையில் மொழி வளத்தை உள்வாங்கி சிறப்பான கவிதைகளை தந்துள்ள கவிஞருக்கு நெஞ்சம் நிறைந்த வாழ்த்துகளை முதலில் தெரிவித்து மகிழ்கிறேன்.

    சித்திரமும் கைப்பழக்கம் செந்தமிழும் நாப்பழக்கம் என்றார் ஔவையார். செந்தமிழ் நாடென்னும் போதினிலே இன்பத் தேன் வந்து பாயுது காதினிலே என்றார் பாரதியார். இந்த கவிதைகள் யாருக்கேனும் புரியாமல் இருக்குமா.? அப்படியானால் மொழி நடையில் எளிய பதத்தை புகுத்தி வாசகரை வாசிக்க செய்வதில்தான் ஒரு படைப்பாளன் வெற்றி அடைகின்றார். அந்த வகையில் கவிஞர் சி.கலையரசன் அவர்களும் வெற்றி அடைந்து இருக்கின்றார்.

சோம்பலுக்குள் மூழ்கிவிட்டால்

மீளமுடி யாது!.. வெறும்

தூக்கம்ஒன்றே நோக்கம்என்றால்

நாளைவிடி யாது!

சாம்பலுக்குள் மீண்டெழும்தீ

எளிதில்அணை யாது!.. உன்

சாதனைக்குப் பூமிப்பந்தில்

ஈடுஇணை ஏது?

     என்று எல்லோரையும் எழுச்சி பெற்று பூமிப்பந்தில் சாதனை புரிய தன்னம்பிக்கையை தூண்டுவார் கவிச்சுடர் கவிதைப்பித்தன் அவர்கள். இதே கருத்தை வலியுறுத்தி இந்நூலின் முதல் கவிதையாக வெற்றி கனியைப் பறிப்பதற்கு தன்னம்பிக்கை என்னும் விதையை விதைக்கின்றார் கவிஞர்.

இலக்கெனும் விதைபதித்து

உழைப்பெனும் நீர்பாய்ச்சி

முயற்சிக் கணைதொடுத்தால்

விழாதோ வெற்றிக்கனி...

 என்று தன்னம்பிக்கையோடு கவிதை நூலை தொடங்குவது கூடுதல் சிறப்பு. அதோடு நின்று விடாமல் உழைப்பின் வியர்வையை உச்சியில் வைத்து கொண்டாடுகின்றார். உழைக்காமல் வியர்வை சிந்தாமல் சம்பாதிப்பது எப்படி என்று பலரும் யோசித்துக் கொண்டிருக்கும் இந்த காலகட்டத்தில் உழைப்பின் பெருமையை பாடுவது சிறப்பு.

வியர்வைத் துளியில்

என் முகம் பார்த்தேன்

அதிலும் உழைப்பின்

வடிவமே தெரிந்தது.....

 என்கின்றார் கவிஞர். ஒரு மனிதனின் வெற்றிக்கு மிக முக்கிய காரணமாக கருதப்படுவது தன்னம்பிக்கையும் அவரது உழைப்பும்தான் என்பதை உணர வேண்டும்.

       பெண்மையை கொண்டாடாத கவிஞர்களே கிடையாது. திருவள்ளுவர் கூட பெண்ணை உச்சம் தொட்டு கொண்டாடியிருப்பார்.

கண்டுகேட்டு உண்டுயிர்த்து உற்றறியும் ஐம்புலனும்

ஒண்தொடி கண்ணே உள.

என்பது திருக்குறள். இதற்கான விளக்கத்தை வாசகராகிய உங்களிடமே விட்டு விடுகின்றேன். ஏனென்றால், தேடலில்தான் உண்மையான ரசனையை உள்வாங்க முடியும்.

பெண்மை மென்மையின்

உறைவிடம்.!

உணர்ச்சி பிம்பத்தின்

ஊற்று.!

இல்லறத்தின் இனிய

ஒளி.!

என்று குறிப்பிடுகின்றார் கவிஞர். ஆமாம், இல்லறத்தின் இனிய ஒளி என்பது மிகையல்ல.

     கனவு மெய்ப்பட வேண்டும் என்கிற கவிதையில் ஆசிரியர்களை மனசார வாழ்த்தி மகிழ்கின்றார்.

சமுதாய வீதியிலே

சாதிமத இருளகற்றும்

சூரியனாய்க் கதிர்பரப்பி

ஒளி தரவே வாழ்த்துகின்றேன்...

     என்று வாழ்த்துவது பாராட்டுக்குரியதுதான். என்றாலும், இந்த சமூகம் ஆசிரியர்களை வேற்று கிரகவாசிகளை போல் பார்க்கும் நிலையும் உருவாகியுள்ளது என்பதும் கவனிக்கத்தக்கது. ஆசிரியர்கள் மாணவர்களை கண்டித்தால்தான் வளரும் தலைமுறையினரின் வாழ்க்கை சிறப்பாக அமையும். ஆனால் நடப்பது என்ன.? மாணவர்களை ஆசிரியர் கண்டித்தால் நடக்கும் போராட்டங்களையும் ஆசிரியர்கள் படும் துயரங்களையும் நாளேடுகளிலும் ஊடகங்களிலும் பார்க்க முடிகிறது. ஆசிரியர்களை கொண்டாடாத சமூகம் எப்படி முன்னேற்றத்தை காணும் என்பதையும் இச்சமூகம் உணர வேண்டும்.

    ஜனநாயகம் என்கிற தலைப்பிலான கவிதையில் தேர்தலை பற்றியும் வாக்களிக்கும் உரிமை பற்றியும் எடுத்துரைக்கின்றார். வாக்களிப்பது நமது உரிமை. அதை பணத்திற்காக அடமானம் வைத்து விடக்கூடாது எனவும் அறைகூவல் விடுக்கின்றார்.

தேர்தல் களத்தில்

நடத்தப்படுவது

ஓட்டு வேட்டை அல்ல

உரிமை வேட்டை.

என்கின்றார். அதனால் சிந்தித்து செயலாற்று உன் சிறப்பறிந்து பணியாற்று என்றும் வழிகாட்டுகின்றார். சரியானவர்களை நாம் தேர்ந்தெடுக்காமல் அது சரி இல்லை இது சரியில்லை என்று குறை சொல்வது எந்த விதத்தில் நியாயம் என்பதையும் சிந்தித்துப் பார்க்க வேண்டும்.

        மனைவியின் சமையல் என்கிற கவிதையில் அவரது மனைவியின் சமையலை வேண்டும் அளவிற்கு கொண்டாடித் இருக்கின்றார். இதன் மூலம் மனைவிக்கு ஏற்ற கணவன் என்பதற்கான நற்சான்றிதழையும் பெற்று விடுகின்றார் என்பதுதான் உண்மை. மனைவியிடம் நற்சான்றிதழ் பெறுவது அவ்வளவு எளிதானது அல்ல. ஆனாலும், இந்தக் கவிதையின் மூலம் கவிஞர் சி.கலையரசன் அவர்கள் மனைவியிடம் பெரும் பாராட்டை பெற்றிருப்பார் என்பதையும் உணர முடியும்.

என் மனைவி விஜயா

சமையல் செய்தால்

வீதியெல்லாம் வாசம்வரும்...

.....

......

பாகற்காய் வறுவலும்

பப்பாளிக் கூட்டும்

வெண்டிக்காய் மண்டியும்

வெள்ளரிக்காய் பச்சடியும்

....

.....

உண்ட கை உடன் மணக்கும்

ஊரெல்லாம் வாசம் வரும்

தென்றல் தவழ்ந்து வரும்

தெருவெல்லாம் வாசம் வரும்...

என்று மனைவியின் சமயலை உலகறிய கொண்டாடி மகிழும் கவிஞர் உண்மையிலேயே அதிர்ஷ்டக்காரர்தான். யாரெல்லாம் மனைவியின் சமையலை கொண்டாடுகிறோம் என்பதை அவரவரின் பார்வைக்கே விட்டு விடுகின்றேன்.

தாயென்ற ஒரு தெய்வம் வீட்டோட இருக்கு…

நீ தனித்தனியா கோவில் குளம் அலைவது எதுக்கு…

அம்மாவின் பாதத்தில் கற்பூரம் கொளுத்து…

ஆனந்த கண்ணீரில் அபிஷேகம் நடத்து…

என்று அருணாச்சலம் திரைப்படத்தில் கவிப்பேரரசு வைரமுத்து அவர்கள் ஒரு பாடலை எழுதி இருப்பார். இன்றைய காலகட்டத்தில் தாய் தந்தையரை பேணி காப்பது அரிதினும் அரிதான செயலாகவே பார்க்கப்படுகிறது. வீதியில் தவழும் விதைகள் என்னும் தலைப்பில்

வீட்டு பெட்டகத்தை

விலை உயர்ந்த

திரவியத்தை பேணிக்

காத்தல் கடனாகும்....

    பெற்றோரை அகவை முதிர்வு காலத்தில் பேணிக்காப்பது நம்முடைய கடமையெனவும் வலியுறுத்துகின்றார்.

விளை நிலங்கள் வீடான கதை என்னும் தலைப்பில்

காடு மேடெல்லாம்

கழனியாக்கி கற்பிளந்து

கடும் விஷப்பாம்பும்

காட்டு விலங்குகளும்

காணாமல் போக

காலம் நேரம் பார்க்காமல்

கடும் உழைப்பால் சீர்திருத்தி

ஏரோட்டும் உழவர்

போராட்டம் நிகழ்ந்த

காலம் எங்கே.?

.....

ஏரோடும் கழனியெல்லாம்

காரோடும் வீதியாச்சே....

தாகம் தணிக்கும்

தண்ணீரும் காசாச்சே

எதிர்காலம் என்னவாகும்

எண்ணிப் பார்த்தாயா.?

என கவலைப்படுகின்றார் கவிஞர். இயற்கையை நேசிக்கும் இந்த மனித இனத்தையும் அனைத்து உயிர்களையும் நேசிக்கும் ஒருவரால் மட்டுமே இப்படி எல்லாம் கவிதை எழுத முடியும்.

     நெஞ்சுக்கு நெருக்கமான கவிதைகளாக படைத்துள்ளார் கவிஞர். கவிதைகளை வாசிக்கின்ற பொழுது அவை உங்களோடு நெருக்கமாக பேசி மகிழும்.

     இந்நூலில் மக்கள் கவிஞர் பட்டுக்கோட்டைகல்யாணசுந்தரம், முண்டாசு கவிஞர் பாரதி, கல்வியாளர் மெக்காலே, பெருந்தலைவர் காமராசர், புரட்சியாளர் அண்ணல் அம்பேத்கர், பொதுவுடமை சித்தாந்தத்தின் பேராசான் தோழர் ஜீவா, சுவாமி விவேகானந்தர் என எல்லோரையும் கொண்டாடி மகிழ்கின்றார். வளரும் தலைமுறையினர் இப்பெரும் ஆளுமைகளைப் பற்றி கட்டாயம் தெரிந்து கொள்ள வேண்டும்.

   தாய்மை, நட்பு, காதல், சமூகம், இயற்கை என அனைத்தையும் பாடுபொருளாக கொண்டு தனக்கான மொழியில் எளிய நடையில் நூலாக வழங்கியிருக்கும் கவிஞரை மனசார பாராட்டி மகிழ்கின்றேன். நடப்பு அரசியலையும் சனாதனத்தின் கோரப்பிடியையும் நிறையவே பாட வேண்டும் என்ற வேண்டுகோளோடு தமிழ் கூறும் நல்உலகிற்க்கு கிடைத்த இக்கவிஞரையும் அவர் அளித்த வீதியில் தவழும் விதைகள் என்னும் நூலையும் கொண்டாடி மகிழ்வது நம்முடைய தலையாய கடமை. ஏராளமான நூல்களை தமிழுக்கு வழங்கி மேன்மை அடைய கவிஞர் சி.கலையரசன் அவர்களை வாழ்த்தி மகிழ்கின்றேன்.

வெளியீடு: மௌவல் பதிப்பகம்

பதிப்பகத்தார் அலைபேசி எண்: 9787709687 , 9488840898

ஆண்டு: 2025

பக்கம்: 176

விலை: ரூபாய் 150/-

நூலாசிரியர்: கவிஞர் சி.கலையரசன்

அலைபேசி எண்: 9524252032

அன்பு பண்பு பாசம்

நட்பின் வழியில்

சோலச்சி