என்னைப் பற்றி

எனது படம்
அகரப்பட்டியைச் சேர்ந்த ''சோலச்சி'' என்னும் நான் இடைநிலை ஆசிரியராகப் பணியாற்றி வருகின்றேன். இயற்பெயர் தீ.திருப்பதி. புதுக்கோட்டை நச்சாந்துபட்டி இராமநாதன் செட்டியார் மேல்நிலைப்பள்ளியில் பத்தாம்வகுப்பு அறிவியல் பாட ஆசிரியர் திருமதி எஸ்.சோலச்சி அவர்கள் 1998 இல் எனக்கும் எங்கள் குடும்பத்திற்கும் உற்ற துணையாக இருந்து எங்கள் வாழ்வில் ஒளியை உண்டாக்கியவர். அதனால் அவரின் பெயரையே புனைப்பெயராக வைத்துக்கொண்டேன்.எனது நூல்கள் :சிறுகதை, 1.முதல் பரிசு2.கருப்புச் சட்டையும் கத்திக் கம்புகளும்3.அட்டணக்கால், கவிதை: 1.காட்டு நெறிஞ்சி 2.விரிசல்1.''முதல் பரிசு'' சிறுகதை நூல் 2017 கல்பாக்கம் சாலோம் அறக்கட்டளை விருது மற்றும் 5000/-(ஐயாயிரம் ரூபாய்) பொற்கிழி.2."கருப்புச்சட்டையும் கத்திக்கம்புகளும்" சிறுகதை நூல் 13.08.2017 சென்னை பொதிகை மின்னல் விருது மற்றும் 3000/- (மூவாயிரம்) பொற்கிழி. 23.12.2018 ராஜபாளையம் மணிமேகலை மன்றத்தின் சிறுகதைச் செம்மல் விருது மற்றும் ரூபாய் 5000/- (ஐந்தாயிரம்) பொற்கிழி.17.02.2019 புதுச்சேரி தமிழ்ச் சங்கம் விருது மற்றும் ரூபாய் 3000/- (மூவாயிரம்) பொற்கிழி.குறிப்பு: முதல்பரிசு மற்றும் கருப்புச் சட்டையும் கத்திக்கம்புகளும் இரண்டு சிறுகதை நூல்களும் எம்.பில் ஆய்வு செய்யப்பட்டுள்ளன. பேச : 9788210863

வெள்ளி, 4 மார்ச், 2016

மதுவை ஒதுக்கிடு தோழா....

மதுவை ஒதுக்கிடு தோழா.....

                                                              நாள்:04.03.2016
      
             நாளும் பொழுதும் தானாய் கழிந்தாலும் மனித வாழ்க்கை பெரும்பாலும்  மதுவாலே அழிக்கப்படுகிறது. தெருவுக்கு தெரு மதுக்கடைகள் கம்பீரமாக நிற்கிறது. குடித்த மனிதன் வாழ்க்கை மட்டும் குப்புறக்கிடக்கிறது. இந்த பூமியில் நல்லது என்று சொல்லக்கூடியவை ஏராளமாய் இருக்கின்றபோதும் தீயது மட்டும்தான் தீவிரமாக நேசிக்கப்படுகிறது.

      மதுக்கலாச்சாரம் கௌரவமாக பார்க்கப்படுகிறது. மதுவை அருந்தாத மனிதனை சமூகம் புறந்தள்ளுவதாக எண்ண வைக்கிறது. மதுவை மனிதன் குடித்தாலும் உண்மை அதுவல்ல. மதுதான் மனித வாழ்வை குடிக்கிறது. "பார்த்து திருந்தனும் இல்லனா பட்டு திருந்தனும் " என்பது கிராமத்து மொழி. இங்கே திருந்துவதற்கு வழியில்லை.  வியாபாரிகள் விற்பனை செய்யத்தான் பார்ப்பார்கள். வாங்குவதும் ஒதுக்குவதும் நம் கையில்தான் இருக்கிறது.

       இன்று அதிகாலையில் உறவினர் ஒருவர் தொடர்பு கொண்டு நண்பர் ஒருவர் இறந்துவிட்டதாக சொன்னார். கேள்விப்பட்டதும் அதிர்ந்து போனேன். மீளாதுயரோடு மாலை ஒன்றை வாங்கிக்கொண்டு நண்பர் வீட்டை அடைந்தபோது  கூட்டம் கட்டுக்கடங்கவில்லை. அழுகையை தேற்றிக்கொண்டு குளிர்பதனப்பெட்டியில் வைக்கப்பட்டிருந்த நண்பரின் உடல் மேல்  மாலையை வைத்துவிட்டு திரும்பினேன். என்னால் நடக்கமுடியவில்லை. யாரோ என் கால்களை இறுகப்பிடித்திருந்தார்கள். குனிந்து பார்த்தேன். நண்பரின் மனைவி கதறுகிறார். எதைச்சொல்லி தேற்றுவது....

          மரணத்திற்கு முதன்மை காரணமாக மது என்று எல்லோராலும் ஒப்புதல் வாக்குமூலம் அளிக்கப்பட்டது. வாழத்தான் பிறந்தோம்.. இறப்பு எல்லோருக்கும் உண்டு.  அதை நாமே தேடிக்கொள்ள வேண்டாமே...

      இறந்த நண்பருக்கு வயது 45. அவரது மனைவி அப்பகுதியின் ஊராட்சி மன்றத்தலைவர் என்பது குறிப்பிடத்தக்கது...

     மாற்றத்தை நோக்கி பயணிப்போம்.....

                    - சோலச்சி
                       புதுக்கோட்டை

கருத்துகள் இல்லை: